Білім беру саласы жарық жылдамдығынан да жоғары қарқынмен түрленіп келеді. Білекпен емес, біліммен бәсекелесетін заман баяғыда басталды. Осы бағытқа бар күш-жігерін салғандар жер-жаһанды таңғалдырып, мән бермегендер дүниенің бар жақсылығынан құр қалып отыр.
Тіпті «Оқусыз білім жоқ, білімсіз күнің жоқ» дегенді тарихта таңбасын қалдырғандар талай айтты. Шынға айналғанын дана дәуір дәлелдеп-ақ келеді. Осы тұста білім беру саласын дамытудың басты кілті – жаңашылдық
ЖАҢАШЫЛДЫҚ – ОҚУШЫНЫ ДАМЫТАДЫ
-Біз сөз етіп отырған «жаңашылдық» оқушы мен оқытушыға қатар керек дүние – мектепті заман талабына сай жабдықтау. Тақтаға таласып, борға жағаласып, компьютер кабинеті үшін кезек күтетін кезеңдер келмеске кетті. Бәрінің орнын қожетімді технология басуы керек. Оқу процесінде мұғалімнің ғана емес, цифрлық мүмкіндікке ие кабинеттердің де маңызы зор. Дәлірек айтқанда интерактивті тақталар, компьютерлер, виртуалды лабораториялар мен симуляциялар мектеп кабинеттерінде толық қамтылса: оқушының теориямен шектеліп қалмай, қолдана білу тәжірибесін дамытуына үлкен жол ашылады.
ДИЗАЙН – ҚАЖЕТТІЛІК
-Жаңа форматқа көшеудің тағы бір ерекшелігі – дизайн қалыптасады. Ал оның өзегі – заманауи жиһаз екені белгілі. Оқушы үшін икемге ыңғайлы, жүріс-тұрысқа жайлы, сабақ оқуға қолайлы сынып ауадай қажет. Жайлылық орнаған жерде шығармашылық шабыт оянып, оқу мен ізденуге деген құлшыныс артады. Эстетика мен ашық дизайнға қанып өскен баланың кретивті ой айтып, ғаламат идеяны жарыққа шығаратыны сөзсіз.
ТЕҢДЕССІЗ ТЕХНОЛОГИЯ ТУДЫРАДЫ
Ғылым ісін меңгермекке – ғылым жолын ұстанбақ, ғалымдар ісінен үлгі алмақ керек. Ол үшін күн-түні оқу аздық етеді. Есеппен достасып, технологияның тілін түсініп, инженерияның құпиясын ашқандар – Марсқа қол созып, шаруаға робот жұмсап, көлікпен көкте ұшып жүр. Табыстың ірі көзін тапқан да солар. Демек оқу кабинеттерінде технология, робототехника, инженерия, математика, ғылымның алғышарттарын пайдалану: аядай сыныптан шығып, алпауыт компания басқаратын арманшыл ғалымдардың шығуына септігін тигізеді.
STEM – БОЛАШАҚТЫҢ ІРГЕТАСЫ
-Тоқсан ауыз сөздің тобықтай түйіні мәселе сөзі қалай оқысаң да «мәселе». Білім мен ғылым көшіне ілесе алмау – ертең туындайтын үлкен мәселенің бастамасы. Жолайырықта тығырыққа тіреліп қалмай, оң бағытты таңдау тек көрегендердің қолынан келеді. Ал ондай жанкешті де дана тұлғалардың іргетасы оқушы кезінде-ақ қаланады. Білім, ғылым, технология, инженерия, математика салаларын бір арнаға тоғыстырған STEM бағытының да мақсаты сол – озық ойлы, бәсекеге қабілетті, замана ағысына ілесе де, қажет болған жағдайда қарсы жүре де алатын азаматтарды қалыптастыру.
АВТОР: АЙБЕК САЛДАТБЕК
